សាលារាជធានីភ្នំពេញ គ្រោងនឹងដាក់ដំណើរការរថយន្តក្រុងសាធារណៈបន្ថែមចំនួន១០ខ្សែទៀត ដើម្បីបម្រើជូនប្រជាពលរដ្ឋនៅក្នុងរាជធានីភ្នំពេញ នៅពេលខាងមុខ។ នេះបើយោងតាមទំព័រ Facebook ផ្លូវការរបស់សាលារាជធានីភ្នំពេញ ដែលគេហទំព័រ KQUBE ទទួលបាននៅថ្ងៃទី០៨ ខែកញ្ញា ឆ្នាំ២០១៥នេះ។
ក្នុងនោះ អភិបាលនៃគណៈអភិបាលរាជធានីភ្នំពេញ ឯកឧត្ដម លោក ប៉ា សុជាតិវង្ស បានឲ្យដឹងនៅលើទំព័រ Facebook របស់ឯកឧត្ដមផងដែរថា កាលពីរសៀលថ្ងៃទី០៧ ខែកញ្ញា ឆ្នាំ២០១៥ ម្សិលមិញនេះ សាលារាជធានីភ្នំពេញ បានទទួលរថយន្តក្រុងដឹកអ្នកដំណើរ ដែលប្រើថាមពលព្រះអាទិត្យមួយគ្រឿង របស់ក្រុមហ៊ុន ស្តាអេច ដើម្បីដាក់រត់សាកល្បងជូនប្រជាពលរដ្ឋជាមួយរដ្ឋាករស្វយ័តរថយន្តក្រុងសាធារណៈ របស់សាលារាជធានីភ្នំពេញ។
នៅលើទំព័រ Facebook របស់ឯកឧត្ដមអភិបាលនៃគណៈអភិបាលរាជធានីភ្នំពេញ បានបញ្ជាក់ថា នៅពេលខាងមុខនេះ សាលារាជធានីភ្នំពេញ នឹងបន្ថែមផ្លូវរត់រថយន្តក្រុងសាធារណៈរហូតដល់១០ខ្សែបន្ថែម ដែលមានរថយន្តពីជប៉ុនចំនួន១៨០គ្រឿង និងពីចិន១០០គ្រឿងបន្ថែមទៀត ដែលកត្តានេះសង្ឃឹមថា បងប្អូនប្រជាពលរដ្ឋនឹងចូលរួម ដើម្បីកាត់បន្ថយការកកស្ទះចរាចរណ៍នៅក្នុងភ្នំពេញ៕
