ក្រុមធំជម្រើសជាតិកម្ពុជា នឹងត្រូវធ្វើការប្រកួតជាមួយក្រុមជម្រើសជាតិស៊ីរី ក្នុងវគ្គជម្រុះជុំទី ២ ពាន 2018 FIFA World Cup Russia ប្រចាំទ្វីបអាស៊ី នៅពហុកីឡដ្ឋានជាតិ នាយប់ម៉ោង ៦:៣០ ថ្ងៃអង្គារនេះ ប៉ុន្តែគ្រូបង្វឹកបានប្រាប់ថា កម្ពុជា នឹងមិនលេងទប់រហូតដូចពេលកម្ពុជា ជួបជប៉ុននោះទេ។
លោក Lee Tae Hoon បានថ្លែងនៅក្នុងសន្និសីទកាសែត នៅពហុកីឡដ្ឋានជាតិ កាលពីម្សិលមិញថា៖«ស៊ីរី គឺជាក្រុមខ្លាំងមួយនៅអាស៊ី ដែលមានកីឡាករធំៗ ដែលទាមទារឲ្យយើងរៀបចំផែនការ និងយុទ្ធសាស្រ្ដ ដើម្បីការពារឲ្យបានច្រើន ព្រោះយើងនៅមានកម្រិតទាបជាងគេ ប៉ុន្តែយើងក៏ត្រូវមានការប្រជែង ជាមួយក្រុមមួយនេះផងដែរ គឺមិនមែនលេងទប់រហូតដូចពេលជួបក្រុមជប៉ុន នៅក្រៅទឹកដីនោះទេ»។
លោកបញ្ជាក់ថា៖«បើទោះបីជាក្រុមស៊ីរី ខ្លាំងជាងយើង ប៉ុន្តែនេះជាការប្រកួតនៅក្នុងទឹកដី ហេតុនេះយើងត្រូវតែឲ្យកីឡាកររបស់យើងលេងឲ្យបានខ្លាំង ក្នុងការវាយបកទៅស៊ីរី វិញ ដើម្បីបង្ហាញដល់អ្នកគាំទ្រពីការខិតខំប្រឹងប្រែងរបស់យើង ហើយខ្ញុំគិតថាកីឡាករខ្ពស់ៗរបស់ស៊ីរី អាចនឹងមានចលនាយឺត ដែលជាឱកាសអាចជួយឲ្យយើងវាយបក នៅពេលយើងទទួលបានបាល់មកគ្រប់គ្រង ម្ដងៗ»។
ក្រុមស៊ីរី កំពុងឈរនៅលេខរៀងទី ១ ប្រចាំពូល E ជាបណ្តោះអាសន្ន ព្រោះ ២ ប្រកួតកន្លងមកនេះពួកគេបានលត់ក្រុមអាហ្វហ្គានីស្ថាន ៦-០ និងបានបន្ដឈ្នះក្រុមសិង្ហបុរី ១-០ ដោយមាន ៦ ពិន្ទុលើស ក្រុម ជប៉ុន និងសិង្ហបុរី ដែលទើបមាន ៤ ពិន្ទុ ខណៈអាហ្វហ្គានីស្ថាន មាន ៣ ពិន្ទុ ប៉ុន្តែកម្ពុជា បានចាញ់សិង្ហបុរី ៤-០ ចាញ់អាហ្វហ្គានីស្ថាន ១-០ និងចុងក្រោយចាញ់ជប៉ុន ៣-០។
លោក Fajr Ibrahim គ្រូបង្វឹកក្រុមស៊ីរី បានថ្លែងក្នុងសន្និសីទកាសែត កាលពីម្សិលមិញថា៖«យើងពិតជាសប្បាយរីករាយ ចំពោះការធ្វើដំណើរមកជួបក្រុមកម្ពុជា នៅពេលនេះ ហើយ ការចាញ់ ៣ លើកជាប់ៗគ្នារបស់កម្ពុជា បានធ្វើឲ្យយើងកាន់តែមានការជឿជាក់ថា យើងនឹងបន្តយកឈ្នះក្នុងការប្រកួតនេះ។ ប៉ុន្តែយើងក៏មិនបានមើលស្រាលក្រុមកម្ពុជា នោះដែរ ព្រោះពី ១ ប្រកួតទៅ ១ ប្រកួត ទម្រង់លេងរបស់កម្ពុជា កាន់តែមានការរីកចម្រើន»។
សម្រាប់ការប្រកួតនៅយប់នេះ ខ្សែបម្រើប្រយុទ្ធ ប្រាក់ មុន្នីឧត្តម ហួយ ផល្លីន និងអ្នកចាំទី អ៊ុំ សេរីរ័ត្ន ត្រូវបានលោក Lee ដាក់ឲ្យចូលលេងវិញ ប៉ុន្តែខ្សែប្រយុទ្ធ ចាន់ វឌ្ឍនាកា ត្រូវបានបង្ខំចិត្តដកខ្លួនចេញ ព្រោះរបួសជើងរបស់គេ ត្រូវការពេលជាង ១ ខែទៀត ដើម្បីព្យាបាល។
យ៉ាងណាក៏ដោយលោក Lee Tae Hoon បានសុំឲ្យប្រព័ន្ធផ្សព្បផ្សាយ ក៏ដូចជាអ្នកគាំទ្រទាំងអស់ កុំឲ្យតម្លៃតែទៅលើ ចាន់ វឌ្ឍនាកា ឬ ប្រាក់ មុន្នីឧត្តម ថាជា Super Star នៅក្នុងក្រុម ព្រោះបាល់ទាត់ត្រូវលេងជាក្រុម ដែលកីឡាករទាំងអស់ សុទ្ធតែមានសារៈសំខាន់ ក្នុងការជួយក្រុមដូចគ្នា មិនមែន ចាន់ វឌ្ឍនាកា និង មុន្នីឧត្តម លេងតែ ២ នាក់កើតនោះទេ។
ហេតុនេះសូមកុំបន្តឲ្យតម្លៃទៅលើតែកីឡាករ ១ ឬ ២ នាក់ នៅក្នុងក្រុម ព្រោះសកម្មភាពនេះ វាធ្វើឲ្យបាត់បង់សាមគ្គីភាពក្នុងក្រុម នឹងអាចធ្វើឲ្យវិស័យបាល់ទាត់នៅកម្ពុជា មានការធ្លាក់ចុះទៅថ្ងៃអនាគត។
ចំណែកខ្សែប្រយុទ្ធប្រធានក្រុម ឃួន ឡាបូរ៉ាវី បាននិយាយក្នុងសន្និសីទកាសែតនោះដែរថា៖«យើងត្រូវតែស្វែងរកឱកាសវាយបកទៅលើក្រុមស៊ីរី គឺយើងមិនលេងទប់សុទ្ធដូចជួបជប៉ុនឡើយ ដើម្បីឲ្យអ្នកគាំទ្របានស្រែកហ៊ោ និងគាំទ្រការប្រកួតរបស់យើង ខណៈពេលនេះយើងកំពុងមានទំនុកចិត្តខ្លាំងក្នុងការប្រកួត»។
គួរបញ្ជាក់ថា តម្លៃសំបុត្រសម្រាប់ចូលទស្សនាការប្រកួតនេះ ត្រូវបានចែកជា ២ ផ្នែកគឺកន្លែងអង្គុយមានដំបូល ១ សន្លឹកថ្លៃ ៣ ម៉ឺនរៀល និងកន្លែងអង្គុយអត់មានដំបូល ១ សន្លឹកតម្លៃ ១ ម៉ឺនរៀល ហើយការប្រកួតនេះក៏មានការផ្សាយបន្តផ្ទាល់តាមកញ្ចក់ទូរទស្សន៍ BTV ផងដែរ៕
