ម្សិលមិញនេះវេបសាយពត៌មានរបស់សហព័ន្ធកីឡាបាល់ទាត់អាស៊ាន ( ASEAN Football Federation ) បានចេញផ្សាយអំពីពត៌មានក្តៅគគុកជុំវិញករណីដែលសហព័ន្ធកីឡាបាល់ទាត់ហ្វីលីពីនបានជូនដំណឹងពីការដកខ្លួនចេញពីការធ្វើម្ចាស់ផ្ទះរៀបចំពានរង្វាន់ធំប្រចាំតំបន់អាស៊ានគឺ AFF Suzuki Cup 2016 ដែលនឹងប្រព្រឹត្តទៅចុងឆ្នាំ២០១៦ខាងមុខនេះ។
ប្រភពមិនបានបញ្ជាក់មូលហេតុនៃការបោះបង់សិទ្ធិធ្វើម្ចាស់ផ្ទះនេះនោះទេ ប៉ុន្ដែហ្វីលីពីន ធ្លាប់សម្រេចចិត្តស្រដៀងគ្នានេះដែរ ដោយមិនបញ្ជូនក្រុមជម្រើសជាតិក្រោយអាយុ២៣ឆ្នាំរបស់ប្រទេសខ្លួនទៅប្រកួតក្នុងព្រឹត្តិការណ៍កីឡាស៊ីហ្គេម កាលពីឆ្នាំ ២០១៣ កន្លងទៅនៅប្រទេសមីយ៉ាន់ម៉ា ដោយគ្រានោះអះអាងថាមិនចង់ចំណាយថវិការរដ្ឋច្រើន ព្រោះកីឡាបាល់ទាត់មិនមានលទ្ធភាពគ្រប់គ្រាន់ដើម្បីប្រជែងយកមេដាយ។
កត្តានេះអាចជាបញ្ហាដ៏ធំមួយសម្រាប់ព្រឹត្តិការណ៏ប្រចាំតំបន់អាស៊ាន ព្រោះហ្វីលីពីន ត្រូវចាប់ដៃជាមួយមីយ៉ាន់ម៉ា ធ្វើជាសហម្ចាស់ផ្ទះក្នុងប្រកួតវគ្គចែកពូល ស្របពេលគណៈកម្មាធិការរៀបចំការប្រកួត នឹងបើកកិច្ចប្រជុំមួយក្នុងពេលឆាប់ៗនេះ។ ការសម្រេចពីការជំនួសសិទ្ធិធ្វើជាម្ចាស់ផ្ទះនេះនឹងត្រូវសម្រេចដោយក្រុមប្រឹក្សារៀបចំការប្រកួត AFF ដែលនឹងធ្វើឡើងជាបន្តទៀតនៅថ្ងៃទី១២ ខែមិនា ឆ្នាំ២០១៦ ខាងមុខក្នុងកិច្ចប្រជុំដែលរៀបចំនៅខេត្ត Da Nang, ប្រទេសវៀតណាម។
គួរបញ្ជាក់ផងដែរថាកម្ពុជានឹងធ្វើជាម្ចាស់ផ្ទះនៃការប្រកួតពានរង្វាន់ AFF Suzuki Cup 2016 ( វគ្គជម្រុះបឋម ) ផងដែរ។ វគ្គជម្រុះបឋមគឺតម្រូវឱ្យក្រុមជាសមាជិកអាស៊ានដែលមានតារាងចំណាត់ថ្នាក់ FIFA តិចជាងក្រុមទាំង៦ ប្រកួតគ្នាយកតែ២ ក្រុមឡើងទៅជួបក្រុមទាំង៦ដែលអង្គុយចាំនៅជុំផ្ដាច់ព្រ័ត្រ។ ការប្រកួតនឹងធ្វើឡើងនៅពហុកីឡដ្ឋានជាតិក្នុងរាជធានីភ្នំពេញ អំឡុងខែតុលា។ ដោយឡែកការប្រកួតជុំផ្ដាច់ព្រ័ត្រ គ្រោងធ្វើនៅខែធ្នូ មុនដាច់ឆ្នាំ៕
ប្រភព៖ វីអាហ្វ៊ូតប៊ល
