លោកលីវិន្ទអភិបាលរងខេត្ដរតនគិរីបានបញ្ជាក់ប្រាប់វេបសាយរស្មីកម្ពុជាតាមទូរស័ព្ទកាលពីថ្ងៃ២៣កុម្ភៈថាមិនមានការវាយបន្ទប់អនាម័យនោះចោលទេព្រោះវាពុំងាយនិងរកលុយរាប់ពាន់ដុល្លារមកធ្វើហើយវាយចោលដោយស្រួលៗនោះឡើយ។
តែទោះជាយ៉ាងណាក្រោយពីឮដំណឹងនេះ មនុស្សជាច្រើនមិនបានសាទរទេ ដោយហេតុថាទោះជាវាមានថ្លៃប៉ុណ្ណាក៏ដោយក៏មានឈ្មោះថាបង្គន់របស់តំណាងប្រទេសមួយរួចជាស្រេចទៅហើយ ដូច្នេះមិនសមនឹងយកមកធ្វើជាកន្លែងធ្វើការរបស់ក្រុមជនជាតិមួយទៀតទេ។ទោះជាក្រលំបាកយ៉ាង មនុស្សត្រូវចេះរក្សាតំលៃខ្លួន ជា
ពិសេសខ្មែរដែលធ្លាប់មានអារ្យធម៌ល្បីល្បាញលើសប្រទេសជិតខាង។
មតិខ្លះបានលើកឡើងថា ដើម្បីកុំអោយកូនខ្មែរជំនាន់ក្រោយៗជាប់ឈ្មោះមិនល្អនិងពួកអគតិថៃដៀលខ្មែរថា"ខ្មែរយកបង្គន់ថៃ"ប្រើជាកន្លែងធ្វើការ គួររក្សាទុកបង្គន់នេះជាបង្គន់ដដែលសំរាប់អ្នកទេសចរដែលទៅទស្សនារមណីយដ្ឋាននេះ។
បង្គន់នោះធ្វើនៅខាងឆ្វេងដៃផ្លូវចុះទៅបឹងយក្សឡោមចម្ងាយជាង១០ម៉ែត្រពីមាត់បឹងធ្វើអំពីបេតុងប្រក់ក្បឿងថៃក្រាលឥតការ៉ូមានទំហំ៣ម៉ែត្រគុណ៤ម៉ែត្រកំពស់ជាង៣ម៉ែត្រ។មានដាក់អំពូលភ្លើងបំពាក់ម៉ាស៊ីនត្រជាក់និងធុងទឹក។
លោកវេនចឹ ប្រធានសហគមន៏បឹងយក្សឡោមបានឱ្យដឹងថាបង្គន់អនាម័យនោះគេបានរៀបសាងសង់កាលពីថ្ងៃទី៣រហូតដល់ថ្ងៃទី១៩ខែកុម្ភ:ទើបធ្វើរួចក្នុងតំលៃជាង៧ពាន់ដុល្លារ។បង្គន់នោះជាងថៃគេធ្វើសម្រាប់តែម្ចាស់ក្សត្រីសិរិនថនបទជើងនៅក្នុងពេលយាងមកកំសានបឹងយក្សឡោមនិងសម្ភោធមណ្ឌលសុខភាពមួយនៅស្រុកអូរជុំប៉ុណ្ណោះ។
ប្រធានសហគមន៏បឹងបានឱ្យដឹងទៀតថាកាលពីថ្ងៃទី២២ខែកុម្ភ:ឆ្នាំ២០១៦ស្ដេចថៃអង្គនោះទ្រង់បានយាងមកទតទេសភាពបឹងយក្សឡោមហើយសើយក្រយ៉ាថ្ងៃត្រង់នៅទីនេះរយ:ពេលតែជាពីម៉ោងរួចនៅថ្ងៃរសៀលទើបព្រះនាងយាងបន្ដទៅសម្ភោធមណ្ឌលសុខភាពនៅអូរជុំតែម្ដង។ប៉ុន្ដែមុនពេលព្រះនាងយាងចេញទៅទ្រង់បានប្រាប់ឱ្យប្រគល់បង្គន់នោះមកឱ្យខាងសហគមន៍យើងដើម្បីធ្វើជាការរិយាល័យធ្វើការវិញ។
លោកទិនលួងចៅសង្កាត់បឹងយក្សឡោមបានឱ្យដឹងតាមទូរស័ព្ទកាលពីថ្ងៃទី២៣ខែកុម្ភ:ឆ្នាំ២០១៦ថាបង្គន់អនាម័យដែលស្ដេចថៃប្រើប្រាស់នោះមិនបានវាយចោលទេព្រោះក្រុមហ៊ុនSGTធ្វើជូនព្រះនាងក្នុងតម្លៃដល់ទៅជាង៧ពាន់ដុល្លារឯណ្ណោះ។បង្គន់នោះអាជ្ញាធរខេត្ដបានឯកភាពគ្នាប្រគល់ឱ្យសហគមន៏បឹងយក្សឡោមធ្វើជាស្នាក់ការ។
ចៅសង្កាត់បានឱ្យដឹងទៀតថាកន្លងមកគណ:កម្មការនិងសហគមន៏បឹងនៅមិនទាន់មានកន្លែងសម្រាប់ធ្វើការដែរហើយទីនោះគឺសាកសមធ្វើជាការរិយាល័យរបស់ពួកគេព្រោះវានៅជិតផែងូតទឹកទី១សំបូរមនុស្សចេញចូលជួបជុំគ្នាច្រើននិងនៅក្បែផ្ទះកូនកំឡោះកូនក្រមុំតំណាងរបស់ជនជាតិផងដែរ។លោកលីវិន្ទអភិបាលរងខេត្ដរតនគិរីបានឱ្យដឹងតាមទូរស័ព្ទកាលពីរសៀលថ្ងៃទី២៣ខែកុម្ភ:ឆ្នាំ២០១៦ថាបន្ទប់អនាម័យនោះគឺគេធ្វើជារបៀបបង្គន់ចល័តក្រោយពេលឈប់ប្រើប្រាស់គេក៏ដោះចាននិងធុងទឹកចេញគឺអាចធ្វើជាការរិយាល័យបានព្រោះគេធ្វើបន្ទប់នោះគឺសម្រាប់ឱ្យសហគមន៏ប្រើប្រាស់៕
ប្រភព៖ រស្មីកម្ពុជា
