ប្រាក់ដុល្លារអាមេរិក ត្រូវបានគេដឹងថា ជារូបិយបណ្ណទី១របស់បណ្តាអ្នកមានប្រាក់ចាយច្រើន ដូច្នេះហើយទើបការដោះដូរទំនិញស្ទើតែទាំងអស់ត្រូវគេបំភ្លេចប្រាក់រៀនខ្មែរ។ តើដោយសារតែហេតុអ្វី?
មិនមែនជារឿងចំលែកទេ បើសិនជាអ្នកកាន់ក្រដាស់ប្រាក់ដុល្លារអាមេរិក រឺប្រើប្រាស់កាតគណន៌ធនាគារចូលទិញទំនិញថ្លៃៗ ប៉ុន្តែគេប្រហែលជាសើចអ្នកនៅពេលដែលប្រើប្រាស់ក្រដាស់ប្រាក់រៀនខ្មែរចំនួនច្រើនទៅទិញរបស់ថ្លៃៗ ទោះជាគេមិនបដិសេធក៏ដោយ ព្រោះគេដឹងថា នៅប្រទេសកម្ពុជា ចាយប្រាក់អីក៏បានដែរ។ ការយល់ឃើញបែបនេះហើយទើបធ្វើអោយប្រាក់រៀនខ្មែរហាក់គ្មានតំលៃ ជាពិសេសធ្វើអោយតំលៃទំនិញលើទីផ្សារពិបាកក្នុងការកំណត់តំលៃច្បាស់លាស់។
មូលហេតុដែលរូបិយបណ្ណបរទេសមានឥទ្ធិពលខ្លាំង រឺពេញនិយមប្រើប្រាស់នៅលើទីផ្សារកម្ពុជាព្រោះ..៖
- ប្រាក់បៀវត្យបុគ្គលិក កម្មករ គឺជាប្រាក់ដុល្លារអាមេរិក
- តំលៃទំនិញរាប់ចាប់តាំងពីសំលៀកបំពាក់ឡើង ត្រូវបានគេគិតជាដុល្លារអាមេរិក។ ដោយហោចទៅ សូម្បីតាមហាងផឹកស៊ី តាមភោជនីយដ្ឋាន ។ល។ សុទ្ធតែគិតជាដុល្លារអាមេរិក។
ជាឧទាហរណ៌គួរអោយអស់សំណើច សូម្បីតែចូលទៅស្តីដណ្តឹងកូនក្រមុំគេ ក៏ត្រូវគេគិតជាដុល្លារអាមេរិកដែរ...
រឿងមួយដែលអ្នកសេដ្ឋកិច្ចគួរតែពិចារណាគឺ ការបើកប្រាក់ខែជាប្រាក់ដុល្លារ តែការដោះដូរទំនិញប្រចាំថ្ងៃមាន មុខម្ហូប បន្លែបង្ការ ជាដើម បែជាគិតលើប្រាក់រៀល ឯទំនិញថ្លៃៗបែជាគិតលើប្រាក់ដុល្លារអាមេរិក ដែលធ្វើអោយអត្រានៃការចំណាយមិនច្បាស់លាស់ និងមិនសមតុល្យទៅនឹងតំលៃទំនិញ និងប្រាក់ចំណូល។ ឧទាហរណ៌ បើប្រាក់ខែ ១០០ដុល្លារអាមេរិក ហើយសាច់ជ្រូកមួយគីឡូ ២ម៉ឺនរៀល អ្នកទិញត្រូវតែដោះដូរជាប្រាក់រៀលទៅទិញ (ត្រូវខាតមួយតង់) បើមិនដូច្នេះអ្នកទិញត្រូវចាយប្រាក់ដុល្លារអាមេរិក ដោយគិតតំលៃស្មើនិង៥ដុល្លារ ត្រូវខាតតំលៃលើស (បើ១ដុល្លារដូរបាន ៤១០០ រៀល អ្នកទិញត្រូវខាត ៥០០រៀល ក្នុងសាច់ជ្រូង១គីឡូក្រាម) មួយតង់ទៀត។ ពេលណាមួយ សាច់ជ្រូកឡើងថ្លៃដល់ ៣ម៉ឺនរៀល តែប្រាក់ខែនៅតែ១០០ដុល្លារអាមេរិក ហើយជួនជាតំលៃដុល្លារធ្លាក់ចុះផងនោះ នឹងកាន់តែធ្វើអោយជីវភាពដុនដាបឡើង។ មូលហេតុទាំងនេះ បានធ្វើអោយអ្នកដែលមានប្រាក់ចំណូលទាប មិនអាចគ្រប់គ្រងការចំណាយប្រចាំថ្ងៃរបស់ខ្លួនឯងបានល្អ។
កាលពីពេលថ្មីៗនេះ មានការចែករំលែកតៗគ្នាអំពីហាង និងឳសថស្ថានមួយចំនួនដែលបានដាក់ប្រកាសដល់អតិថិជនរបស់ខ្លួនថា «ទទួលតែប្រាក់រៀលប៉ុណ្ណោះ» គឺពិតជាទទួលបានការគាំទ្រច្រើន និងបានក្លាយជាសារដ៏សំខាន់ក្នុងការដាស់តឿនឈ្មួញ និងអាជីវករអោយងាកមកគិតលើការកំណត់តំលៃទំនិញរបស់ខ្លួនជាប្រាក់រៀលវិញ។
ដូច្នេះក្នុងនាមជាប្រជាពលរដ្ឋខ្មែរ គួរណាស់តែគាំទ្រការចាយប្រាក់រៀលខ្មែរអោយបានទូលំទូលាយ ហើយអ្នកដែលកំពុងប្រកបអាជីវកម្មគួរណាស់តែកំណត់មុខតំលៃទំនិញរបស់ខ្លួនជាប្រាក់រៀល។ សូមធ្វើជាអ្នកដំបូង នោះ អ្នកនឹងទទួលបានការគាំទ្រច្រើនបំផុតពីអតិថិជនរបស់អ្នក។
