ប្រភព៖ កីឡាដេលី
Booysen Shane សារភាព ចង់លេងឲ្យជម្រើសជាតិកម្ពុជា តែជាឱកាសសែនឆ្ងាយ
សែប្រយុទ្ធក្រុម ភ្នំពេញក្រោន សញ្ជាតិអាហ្វ្រកខាងត្បូង Booysen Shane បានទម្លាយចំណាប់អារម្មណ៍ផ្ទាល់ខ្លួនថា គឺជាក្ដីរីករាយនិងកិត្តិយសប្រសិនខ្លួនអាចលេងឲ្យក្រុមជម្រើសជាតិកម្ពុជា ដោយការចូលសញ្ជាតិខ្មែរនៅថ្ងៃណាមួយនោះ។ Booysen Shane និយាយបែបនេះថា ៖«ខ្ញុំគិតថាវាជាកិត្តិយសដ៏ធំធេងប្រសិនខ្ញុំអាចចូលលេងឲ្យជម្រើសជាតិកម្ពុជាដូចគេថាមែន។ ប៉ុន្តែខ្ញុំគិតថាវាត្រូវឆ្លងកាត់នីតិវិធីស្មុគស្មាញណាស់ តាមមើលទៅ។ បើអ្វីៗអាចកើតឡើងអីចឹងមែន កាន់តែលឿនគឺខ្ញុំរីករាយនឹងចូលរួមជាមួយជម្រើសជាតិកម្ពុជា។ ប៉ុន្តែសំខាន់ឥឡូវខ្ញុំលេង ឲ្យក្រុមខ្ញុំ ភ្នំពេញក្រោន ហើយបើអ្វីកើតឡើងទៀត ថាខ្ញុំអាចលេងឲ្យជម្រើសជាតិឬយ៉ាងម៉េច គឺតាមហ្នឹងទៅ តែពេលខ្ញុំផ្ដោតលើក្រុមរបស់ខ្ញុំ»។ ការបរិយាយរបស់ខ្សែប្រយុទ្ធកម្ពស់ ១៦៨សង់ទីម៉ែត្រ ដែលធ្លាប់លេងនៅ Division 2 ថៃ២រដូវកាលរូបនេះ បានទម្លាយឡើងឆ្លើយតបនឹងចចាមអារាម មួយចំនួនដែលថាខ្លួនទំនងនឹង ទទួលការសម្របសម្រួលពីសហព័ន្ធកីឡាបាល់ទាត់កម្ពុជា ឲ្យទទួលបានសញ្ជាតិខ្មែរ និងជាប់ជាសមាជិកជម្រើសជាតិសម្រាប់យុទ្ធនាការផ្សេងៗ តាមរយៈភាពលេចធ្លោរបស់ខ្លួនក្នុងលីគរដូវកាលមុន។ ទាក់ទិននឹងចរចាមអារាមដែលអ្នកនិយមបាល់ទាត់ជាតិចង់ជីកកកាយឫសគល់នេះ ត្រូវបានលោកម៉ៃ តុលា អគ្គលេខាធិការរងសហព័ន្ធកីឡាបាល់ទាត់កម្ពុជា ច្រានចោល។ លោកថាលទ្ធភាពយកកីឡាករបរទេសលេងឲ្យជម្រើសជាតិគឺអាចទៅបាន គឺអនុលោមតាមច្បាប់របស់ FIFA ដោយគ្រាន់តែកីឡាកររូបនោះ លេងក្នុងស្រុកហោច២ឆ្នាំឡើងទៅ។ ប៉ុន្តែសហព័ន្ធមកទាល់ពេលនេះ ពុំទាន់ពិចារណា ករណីនេះនៅឡើយ។ លោកថាប្រសិនអនាគតសហព័ន្ធគិតពីបញ្ហានេះ ក៏នឹងធ្វើឡើងជាមួយកីឡាករណាលេចធ្លោល្អខ្លាំង ខណៈសព្វថ្ងៃលោកកត់សម្គាល់ថា កីឡាកររបទេសនៃលីគកម្ពុជា នៅពុំទាន់មានបច្ចេកទេសខ្ពស់ដាច់ឆ្ងាយពីកីឡាករក្នុងស្រុកខ្លាំងនៅឡើយ៕
ប្រភព៖ កីឡាដេលី
ប្រភព៖ កីឡាដេលី
