ថ្វីដ្បិតតែផលិតកម្មថោន បានរបូតបាត់ធនធានអ្នកចម្រៀងដ៏មានទឹកដមស្រទន់ ទាក់ទាញលើគ្រប់ចង្វាក់ប្រជាប្រិយ កញ្ញា សុគន្ធ នីសា មកចូលទ្រនំចាស់ ផលិតកម្មរស្មីហង្សមាស នៅមានតារាចម្រៀងបង្គោលធំនាងមាស សុខសោភា នោះជាមួយអ្នកនិពន្ធផលិតកម្មថោន សុទ្ធតែបង្ហាញអំពីជំហរជោគជ័យជាពិសេសចំពោះអាល់ប៊ុមសម្រាប់ចូលឆ្នាំខាងមុខ។
កាលពីថ្ងៃទី ១៨ ខែកុម្ភៈ ផលិតកម្មថោនដែលប្រជុំអស់តារាចម្រៀងរបស់ខ្លួន ជញ្ជូនជើងទៅជុំគ្នានៅស្ទូឌីយោភាពយន្ដរបស់ក្រសួងវប្បធម៌ និងវិចិត្រសិល្បៈនៅក្រុងច្បារមន ខេត្ដកំពង់ស្ពឺ រួមជាមួយតារាសម្តែងល្បីៗរាប់រយដួង ក៏មានវត្ដមានថតអមឆាកផងដែរ។
ពីទស្សនីយភាពបទចម្រៀង ជាចំណងដៃវ៉ុលចូលឆ្នាំប្រពៃណីខ្មែរ ភាគច្រើនជាចង្វាក់ប្រជាប្រិយខ្មែរ និងកន្ទ្រឹមនោះ លោក មាស សុខរតនៈ បានបញ្ជាក់ថា៖ «សម្រាប់វ៉ុលពិសេសចូលឆ្នាំប្រពៃណីខ្មែរ ឆ្នាំនេះ ផលិតកម្មបានតៀមថតចំនួន ៤០ បទ ដែលបែងចែកឲ្យមានគ្រប់តារាចម្រៀងក្នុងផលិតកម្មទីក្រុងភាពយន្ដថោនទាំងអស់»។
ជាមួយគ្នានោះដែរ អ្នកនិពន្ធ និងជាអ្នកចាត់ការទូទៅផលិតកម្មថោនរូបនេះ បញ្ជាក់ថា៖ «ឆ្នាំនេះផលិតកម្មថោនបានសម្រិតសម្រាំងជាពិសេសនូវចម្រៀងប្រមាណ ៤០ បទ ក្នុងនោះបទ Original Song មានចំនួនប្រហែលជា ៧០ ទៅ ៨០ ភាគរយ»។
លោក យឹម តាស្រង់ ជាអ្នកនិពន្ធផលិតកម្មថោន អះអាងថា ដោយសារតែលោកវល់ភារកិច្ចច្រើនសម្រាប់ឆ្នាំនេះ លោកប្រាប់ថា ស្នាដៃរបស់លោកសម្រាប់អាល់ប៊ុមចូលឆ្នាំខាងមុខនេះ ហើយកំពុងថតនេះ មានតែ ១៥ បទទេ»។
ប៉ុន្តែលោកបានបញ្ជាក់បន្ថែមទៀតថា ក្នុងចំណោមចម្រៀងទាំង ១៥ បទនោះ លោកគិតថា ចម្រៀងអាចល្បីខ្លាំងនៅឆ្នាំនេះ ដូចជា បទ «Style ខ្ញុំ» របស់នាយ គ្រឿនជាដើម៕